Уһуйааччым уонна коллегам Геннадий Баишев

Уһуйааччым уонна коллегам Геннадий Баишев

 

 

navigate_before
navigate_next

1979 с. Ленинградскай эстраднай айар мастерскойга үҥкүү үөрэҕэр олус кыһаллан, туох баар сырабын биэрэн туран үөрэнэ сырыттахпына, үөрэнэр балетнай залбытыгар уһун курбуу көнө уҥуохтаах, бааһынайдыҥы кыраһыабай сирэйдээх, сахаҕа уһун атахтаах, бэрт сэмэй эдэр киһи үҥкүүгэ үөрэтэр учууталларбытын кытта чэпчэкитик киирэн кэлбитэ. Айар мастерской директора, СССР искусствотын деятеля Исаак Штокбанк үөрэн туран билиһиннэрдэ… Күндү саха сириттэн кэлэн үөрэнэ сылдьар үҥкүү балетын студеннара, бу эһиги республикаҕытыгар оҥоһуллар бастакы Саха государственнай үҥкүү ансаамблын уус-уран салайааччытынан уонна балетмейстерынан буолар, эһиги биир дойдулааххыт Геннадий Семенович Баишев диэн билиһиннэрдэ. Биһиги, саха эдэр оҕолоро, дьэ аан бастаан сахабыт балетын үҥкүүһүтүн дьэ аттыттан көрөн, биһигини кытта бииргэ үҥкүү кэрэ абылаҥын аартыгар салайан-дьаһайан айанныыр буолбуппут.

Геннадий Семенович Баишев Новосибирскай балетнай училищены бүтэрэн Якутскай музыкальнай театрыгар балет солиһынан үҥкүүлээбит сылларыгар мин Тааттаҕа кыра кылааска үөрэнэ сырыттахпына гастролга кэлэ сырыттаҕына афиша ыйаабыттар этэ, РДК биллэриитин зонатыгар. Онно кини илиитигэр сибэкки букетын тутан турар, накидкалаах, Альберт уобараһыгар турар “Жизель” балет афишатын ыламмын дьиэбэр аҕалан истиэнэҕэ ыйаабытым. Уонна көрө сылдьаммын мин эмиэ улааттахпына бу үҥкүүһүт курдук артыыс буолуом диэн баҕа санаа үөскээбитэ.

Геннадий Семеновиһы кытта элбэх сиргэ гастроллаан, айаннаан, элбэх үҥкүү, спектакль, концерт тахсарыгар үлэлээн, репетиция бөҕө, испэктээх туруоруутун ааһан олус дьаныардаахтык айар талаан күүстээх үлэтин көрсүбүппүт уонна таһымнаахтык таһаарбыппыт.

Геннадий Баишев олус үчүгэй балетнай классическай экзерсис урок биэрэр этэ, кини педагог быһыытынан олус үчүгэйдик дьарыктыыр этэ. Үҥкүүһүт киһи этэ хаана сайдарыгар олус туһалаах комбинациялары оҥортороро. Киһи үҥкүүһүт быһыытынан сайдар этэ-сиинэ, быччыҥнара.

Уус-уран салайааччы быһыытынан сөп ыйыылары, кэрдиилэри биэрэрэ. Государственнай үҥкүү ансаамбылыгар элбэх Саха сиригэр олорор омуктар үҥкүүлэрин туруоран пропагандалыыра.

Элбэх улуустарга гастролга сылдьан киновидеоҕа мэлдьи устара. Үҥкүүлэри ыйыталаһар этэ олохтоох дьоннортон. Геннадий Баишев саха үҥкүүтэ сайдыытыгар улахан кылааты киллэрбитэ. Саха үҥкүүтэ уобарастардаах испэктээктэри туруорбута, араас уобарастары айбыппыт, ол артыыс үҥкүүһүккэ сайдарыгар олус күүскэ көмө буолара.

Геннадий Баишев киһи өттүнэн олус элэккэй киһи буолар. Артыыска айар үлэтигэр күүс-көмө буолар, бэйэтин профессиональнай айымньылаах үлэтиттэн сүбэ-ама буолар.

Геннадий Семенович саха үҥкүүтүгэр киллэрбит улахан кылаата үйэ- саас тухары театральнай искусствоҕа хаалыа, эдэр саха хореографтарыгар үчүгэй холобур буолуо диэн эрэнэбин.

Геннадий Семеновичка махтанабын профессиональнай үҥкүү кэрэ чыпчаалыгар иитэн-үөрэтэн таһааран миигин наруодунай артыыс буолуохпар тиийэ, Россия үтүөлээх артыыһа тиийэ сайдарбар, үҥкүүһүт солист быһыытынан үҥкүү театрыгар үлэлэппитигэр улахан махталбын тиэрдэбин.

Российскай Федерация уонна Саха Республикатын үтүөлээх артыыһа, Саха Республикатын народнай артыыһа, Россия театральнай искусствотын деятеллэрин Сойууһун чилэнэ, Кыыл Уолун аатынан үҥкүү театрыгар солиһынан үлэлээбит артыыс Афанасий Афанасьев.

Дьокуускай к., 2021 с.