ТОХСУННЬУ ТОЙУГУН ТУСКУЛЛААХ ТУСАҺАТА

ТОХСУННЬУ ТОЙУГУН ТУСКУЛЛААХ ТУСАҺАТА

 

navigate_before
navigate_next

Тохсунньу томороон тымныытыгар айыы уот- айар кут алгыс тыына саҕыллан,Эстрада театрын дьоҕус саалатыгар саҥа сылбыт саргы дьаалыта салалынна.Поэзия уонна Муусука тусаһатыгар дьон-сэргэ түһүлгэлээн олорон хоһоон уонна дорҕоон тойугун иһийэн иһиттэ,ичигэс,иһирэх тыыныгар итиннэ.
Онлайн улаҕатыгар уйаламмыт олохтон оронон тахсан тыыннаах олох тырым тыыныгар төннөр, уот тыл уоҕуттан төлөнүрэн ,кыл кырыымпа кылыкынас дорҕоонугар уйдаран санаа санаабыккын аһаҕастык этэр,иэйбиккин-куойбуккун,таптаабыккын да этинэр тохсунньу тойуга эҥсиллэн иһиллэрэ күндүтүн эбитин!
Кэм тыйыс кырдьыгын,олох айыы сырдыгын сүрэхтэрин нөҥүө аһаран айар айылгылаах хоһоонньут дьоммут куолайдарын иһиттэн бу кэм куолакалын дорҕооно,бу кэм чуораана да чугдааран иһиллэргэ дылы буолла.
СӨ Үҥкүүтүн театрын иһинэн ,Саха национальнай оркестрын кытары холбоһон,поэзия уонна музыка киэһэтин тэрийбит бу бырайыак ааптардара: СӨ бэчээтин туйгуна,бэйиэт Зинаида Архипова,СӨ култууратын туйгуна, “Кыл Саха” салайааччыта Анна Томская буолаллар.
Тохсунньу тойугун алыптаах муусука доҕуһуолугар уйдаран
утуу-субуу тахсаннар хоһоон тылынан хомуһуннана туойдулар: Зинаида Архипова,Рустам Каженкин,Елизавета Мигалкина,СаргылаанаГольдерова-Саргы Куо,Яна Байгожаева,Ангелина Васильева -Дайыына,Мария Алексеева-Арылы Дуйдаах,Наталья Михалева-Сайа,Гаврил Андросов -Хабырыыс Ондороос.Александра Матвеева-Долгура хоһооннорун СӨ народнай артыыһа Дмитрий Артемьев айымньы өйдөбүлүн тиэрдэр курдук иэйэн-куойан аахта.
Бу сыллар устата уонча бырайыагы олоххо киллэрэн,тыл уонна муусука эйгэтин дьүөрэлээн ” Тыл кыһата” айар холбоһук уонна ” Кыл Сахалар” дьон сэргиир дьоро киэһэлэрин тэрийбиттэр. Үтүө үгэс салҕанар.
Тыл театра саха олоҕор куруутун да баар эйгэ буоллаҕа.Араас хайысханан аан аартыктанан айар кут айбыта-туппута айыы дьонугар иһиллэн тиийэр,ыра санаа кытылларыгар да тиксэр.
Өйдүүбүн ээ,2004с.бастакы хараҥаччы буолбут бастыҥ бырайыагы: Анна Ахматова аатырбыт “Реквиемын” Сардаана Амгинская тылбааһыгар СӨ народнай артыыската Зоя Багынанова национальнай оркестырбыт доҕуһуолунан аахпыта этитиилээх тыын буолан эҥсиллэн иһиллибитэ,дорҕоонноох тойук буолан доллоһуйа кутуллубута.Ол курдук улаатан,дириҥээн -кэҥээн ,СӨ ускуустубатын үтүөлээх деятелэ Николай Петров салайааччылаах национальнай оркестырбыт Зоя Багынанованы,Сардаана Амгинскаяны кытары улуу бэйиэт Анна Ахматова Санк-Петербуругар айаннатан тиийэн иһитиннэрбиттэрин. Үрдүк эйгэлээх консерватория хараам саалатыгар сахалыы тыыннаммыт,сата тылламмыт “Реквиеми” Россия дьоно-сэргэтэ иһийэн-иһиллээн,дьиктигэ тиксибиттии долгуйа истибиттэрин

Хайы үйэ История кэрэһитэ буолбут ол Кэм айыы ситимин Тохсунньу тойуга бигэргэттэ курдук.
Поэзия уонна Муусука олоҕу сүрүннүүр сырдык күүс буоларын бу кэм айар куттаахтара итэҕэтэр дьоро киэһэбит доллоһуйа уһунна.
Аны да,
хатан тымныыттан,олох тыйыс да тыыныттан буһан-хатан ,уран эйгэҕэ уйан кута уһаарыллан Айыы саха айыллан таҕыстын , Айар уох – Айыы уот Алгыс аалын көтөхтүн!

Саргылаана Гольдерова-Саргы Куо.Бэйиэт.
Тохсунньу .2021с