«Тохсунньу тойуга» - тыл уонна дорҕоон тусаһата толору сааланы муста

«Тохсунньу тойуга» - тыл уонна дорҕоон тусаһата толору сааланы муста

 

 

navigate_before
navigate_next

Тохсунньу тоһуттар тымныытын уонна туманын толлубакка тохсунньу 21 күнүгэр Сергей Зверев-Кыыл Уола аатынан Саха Өрөспүүбүлүкэтин Үҥкүүтүн тыйаатырын Саха аркыастыра уонна бэйиэттэр мустан «Тохсунньу тойуга» тыл уонна муусука тусаһата диэн сүрдээх истиҥ иэйиилээх уонна кэрэ ис хоһоонноох тэрээһиҥҥэ көрөөччүлэр, кэрэ эйгэ, поэзия уонна муусука сүгүрүйээччилэрэ тоҕуоруһа мустаннар, астынан, үөрэн-көтөн, дуоһуйа иһиттилэр уонна көрдүлэр. Бырайыак ааптардара Арассыыйа суруйааччыларын сойууһун чилиэнэ, Саха Өрөспүүбүлүкэтин бэчээтин туйгуна Зинаида Архипова уонна Саха аркыастыр артыыһа, Саха Өрөспүүбүлүкэтин култууратын туйгуна Анна Томская.

Анна Томская оҕо сааһа айар куттаах дьиэ кэргэҥҥэ ааспыта. Аҕата Иван Никитич Корякин–Уйбаан Бөтүүнүскэй суруйааччы, бэйиэт. Кинилэр дьиэлэригэр улахан баайдара диэн элбэх кинигэ, хаһыат, сурунаал буолар эбит. Хас кэлбит ыалдьыт баай библиотеканы көрөн сөҕө махтайара. Инньэ гынан элбэх оҕолоох дьиэ кэргэн оҕолоро бары умсугуйан туран наар ааҕар, үөрэнэр, саҥаҕа тардыһаллара. Ону таһынан сотору-сотору аҕаларыгар куораттан уонна ньэһилиэктэртэн айар куттаах дьон мустан дэлби хоһоон, кэпсээн ааҕан, бэйэ-бэйэлэрин кытта сэһэргэн, ырытан, дуоһуйуохтарыгар дылы кэпсэтэр үгэстээхтэрэ. Ону кыра Аанчык саҥата суох, сөбүлээн истэрэ, бэйэтэ эмиэ хоһооннору ааҕа улааппыта. Онон кини тыл абылаҥар оҕо сааһыттан киирбит, тыл киниэхэ чугас.

Күн-дьыл ааһара түргэниэн, бу бырайыак муусука уонна тыл ситимнэнэн барбыта номнуо онус төгүл буолан ааста. Бэйиэттэр Зинаида Архипова, Рустам Каженкин, Елизавета Мигалкина, Саргылана Гольдерова-Саргы Куо, Яна Байгожаева, Ангелина Васильева-Дайыына, Ангелла Попова, Мария Алексеева-Арылы Дуйдаах, Наталья Михалева-Сайа, Гаврил Андросов-Ондороос бэйэлэрин айымньыларын Саха аркыастыр, аркыастыр “Кыл Саха” төрүт дорҕоон бөлөҕүн доҕуһуолунан долгуйан, дууһаларын-сүрэхтэрин ууран, өрө көтөҕүллээхтик аахтылар, дьон-сэргэ сэҥээриитин ылыан ыллылар. Бу тэрээһиҥҥэ тыйаатыр биир киэн туттар киһитэ, Саха Өрөспүүбүлүкэтин норуодунай артыыһа Дмитрий Артемьев чугас доҕоро бэйиэт Александра Матвеева-Долгура айбыт «Ытык Алтай» циклтан «Топшуур, эн билэҕиэн…» айымньыны итэҕэллээхтик аахта. Дьон-сэргэ киниэхэ ытыстарын тыаһынан күндүлээтилэр.

Кэнсиэр бүппүтүн кэннэ Саха аркыастыр сүрүн дирижера, Саха Өрөспүүбүлүкэтин ускуустубатын үтүөлээх деятелэ Николай Петров бэйиэттэргэ улахан махталын биллэрдэ, аркыастыр дискаҕа түспүт муусукатын бэлэх уунна уонна инникитин да кинилэри кытта бииргэ ситимнээхтик үлэлэһэн, айан-тутан, бырайыактары тэрийэрин туһунан сэһэргээтэ. Кыттыылаахтар, айар куттаах бэйиэттэр бары үөрэн-көтөн, чаҕылыһан, бу баар дьол бэйэ айымньытын киэҥ тусаһаҕа таһаарар диэн

санааларын эттилэр, инникитин маннык тэрээһиҥҥэ чопчу кыттабыт диэн баҕа санааларын бүк эттилэр.

Вера Черноградская