“Саас кэллэ Чурапчыбар” бырайыак сэргэхтик, өрө таһаарыылаахтык буолан ааста.

“Саас кэллэ Чурапчыбар” бырайыак сэргэхтик, өрө таһаарыылаахтык буолан ааста.

navigate_before
navigate_next

Сергей Зверев-Кыыл Уола аатынан Үҥкүү тыйаатырыгар муус устар 2 күнүгэр “Саас кэллэ Чурапчыбар” “Чурапчылар ыллыыллар” бырайыак кыттыылаахтарын бырааһынньыктааҕы улахан кэнсиэрэ үрдүк таһымнаахтык, сэргэхтик, өрө көтөҕүллэн ааста. Бырайыак ааптара Саха аркыастыр артыыһа, СӨ култууратын туйгуна, ырыа айааччы, тэрийээччи Диринтэн төрүттээх Василий Дмитриевич Эверстов. Кини 2000 сылтан сылтан сүүрэн-көтөн, кэпсэтэн-ипсэтэн, иилээн-саҕалаан биир дойдулаахтарын, Чурапчы кэрэ, мааны куоластаах артыыстарын, уус-уран кэлэктииптэр ырыаһыттарын муһан, бэртээхэй бырайыагы толкуйдаан 20 тахса кэнсиэри тэрийэн ыытта. Ону таһынан Саха аркыастыр иһинэн былырыын “Тоҕус томтор” диэн ааттаах бөлөх тэрийэн билигин ырыаһыттар бөлөх доҕуһуолунан ыллыыллар. “Тоҕус томтор” бөлөххө СӨ үтүөлээх артыыһа Валерий Ноенохов, СӨ култууратын үтүөлээх үлэһитэ Людмила Белолюбская, СӨ култууратын туйгуннара Валентина Колесова, Александра Никонова, Афанасий Федоров, Дмитрий Винокуров, Елена Ноева, Марианна Попова, Виктор Винокуров-Дабайаан, Максим Бордонскай уонна эдэр муусукааннар Дьулустаан Никифоров, Савва Муксунов бааллар. Бөлөҕү салайар – дирижер, СӨ култууратын туйгуна Егор Федотов.

Бэҕэһээҥҥи кэнсиэркэ кыттыыны ыллылар: Арассыыйа наука Академиятын боччуоттаах ветерана, СӨ култууратын үтүөлээх улэһитэ, биологическай наука кандидата Клара Ксенофонтова, «Эдэр талааннар» Арассыыйатааҕы күрэстэр III степеннээх лауреата 2017 с., «Көмүс дорҕооннор» Арассыыйатааҕы күрэстэр II степеннээх лауреата. 2018-2019 сс., Өрөспүүбүлүкэтээҕи күрэстэр кыайыылааҕа, Дьокуускайдааҕы муусука кэллиэһин СӨ үтүөлээх үлэһитэ Р.Н.Крылова үөрэтэр кылааһын II куурсун устудьуона, Диринтэн төрүттээх баянист – Дьулус Васильев, СӨ култууратын үтүөлээх үлэһитэ, Арассыыйа суруналыыстарын Сойууһун чилиэнэ Лена Керемясова, Муусука Үрдүкү оскуолатын уһуйааччыта, духовой ударнай үнүстүрүмүөннэр кафедраларын сэбиэдиссэйэ, профессор, СӨ үтүөлээх артыыһа Александр Кузьмин, Эстрада тыйаатырын солиһа, СӨ култууратын туйгуна, бу соторутааҕыта Е.Федотов дирижердаах «Тоҕус томтор» бөлөх доҕуһуолунан «За Великую державу» бүтүн Арассыыйа үрдүнэн патриотическай ырыа күрэҕэр кыттан, профессиональнай ырыаһыттар ортолоругар 1 миэстэни ылбыт – Татьяна Андросова – Андриана, СӨ филармониятын артыыһа, Арктическай государственнай институт устудьуона, А.Лыткина аатынан опернай ырыаһыттар күрэстэрин Гран-при хаһаайына, А.Самсонов – Айыы Уола аатынан күрэс Гран-при хаһаайына, М.Лобанов аатынан опернай ырыаһыттар күрэстэр II степеннээх лауреата, араас Аан дойдутааҕы ырыа күрэстэрин лауреата, дипломана – Рустам Слепцов, СӨ култууратын туйгуна, ырыа айааччылар Сойууһун чилиэнэ Алексей Потапов, СӨ култууҏатын туйгуна, Ырыа айааччылар Сойууһун

чилиэнэ Марианна Федотова-Намыына, “Тэтим” радио ыытааччыта Иван Тарасов, тыйаатыр үҥкүүһүттэрэ – СӨ култууратын туйгуна Мария Заболоцкая, СӨ үтүөлээх артыыһа Владислав Попов уонна Эдуард Жирков, Саха сиринээҕи Суут департаменын салаатын салайааччыта Александр Петров, Геннадий Семенов – Урааҥхай уонна баянист Виктор Винокуров-Дабайаан. Василий Эверстов бэйэтэ эмиэ хас да ырыаны ис киирбэхтик, истиҥник толордо.

Икки аҥар чаас устата Саха сирин, Арассыыйа ырыа айааччыларын бастыҥ ырыаларын истэн көрөөччүлэр астыннылар, барҕа махталларын ытыс тыаһынан биллэрдилэр.

Василий Эверстов инникитин былаана киэҥ-куон, улахан. “Чурапчылар ыллыыллар” бырайыагы өссө үрдүк таһымҥа таһаарар баҕа санаалаах. Уонна сылын ахсын бу сүүрбэттэн тахса сыл курдук Чурапчы талааннаах, мааны, кэрэ куоластаах дьонун-сэргэтин бэйэтин тула муһан бииртэн биир чаҕылхай, сэргэх кэнсиэртэри тэрийиэ диэн бүк эрэнэбин. Баҕарабын Василий Дмитриевичка чэгиэн-чэбдик олоҕу, айар үлэтигэр ситиһиилэри, тус олоҕор дьолу-саргыны.

Вера Черноградская