«Чурапчылар ыллыыллар» бырайыак дьон-сэргэ кутун-сүрүн тутта, биһирэбилин уонна билиниитин ылыан ылла.

«Чурапчылар ыллыыллар» бырайыак дьон-сэргэ кутун-сүрүн тутта, биһирэбилин уонна билиниитин ылыан ылла.

20 тахса сыл устата Саха аркыастыр артыыһа, СӨ култууратын туйгуна Василий Эверстов иилээн-саҕалаан, сүүрэн-көтөн тэрийэр «Чурапчылар ыллыыллар» бырайыага дьон-сэргэ кутун-сүрүн тутта, биһирэбилин уонна билиниитин ылыан ылла. Кулун тутар 5 күнүгэр, сааскы маҥнайгы кэрэ аҥардар бырааһынньыгын иннинэ, бу бырайыак өрө көтөҕөллүүллээхтик, чаҕылхайдык буолан ааста. Чурапчыттан төрүттээх ырыаһыттар Андреана, Лена Жиркова-Добун Кыыһа, Геннадий Семенов-Урааҥхай, Намыына, Мария Макарова, Клара Ксенофонтова, Рустам Слепцов, Константин Мохначевскай уо.д.а. иэйэн-куойан, ис киирбэхтик ырыа маанытын уонна кэрэтин «Тоҕус томтор» Саха аркыастыр иһинэн баар бөлөх доҕуһуолунан толородулар (дирижер Егор Федотов). Кэнсиэри урукку сыллартан ситиһиилээхтик ыытааччы, бырайыак сценарыйын суруйааччы, Мугудайтан төрүттээх, СӨ култууратын туйгуна Николай Терютин салайан бэрт сэргэхтик ыытта. Кэлбит дьон бары дуоһуйан-сынньанан, махтанан, үөрэн-көтөн дьиэлэригэр тарҕастылар.