Тыыннаах музыканы дуоһуйа иһиттибит

Ахсынньы 20 күнүгэр Хаҥалас улууһун Дьэр нэһилиэгэр Сергей Зверев — Кыыл Уола аатынан Үҥкүү театрын саха национальнай инструменнарын оркестра кэлэн оскуола үөрэнээччилэригэр уонна олохтоохторго музыка бырааһынньыгын тэрийэн аастылар.

Тыа дьоно, биһиги үксүбүт, маннык кэнсиэри анаан-минээн куоракка киирэн мээнэ көрбөт буолан, бу күн бүтүн оркестр тахсан кэнсиэрдээбитин бэрт сонургуу уонна дуоһуйа көрдүбүт, иһиттибит. Тыыннаах доҕуһуол диэни көрөн-истэн астынныбыт. Оркестр толоруутугар сахалыы, нууччалыы уонна  атын да норуоттар ырыаларын, музыкальнай айымньыларын бу тутан олорон истэр ураты эйгэни үөскэтэрин эппитинэн-хааммытынан ылынан бэркэ сэҥээрдибит. Артистарбыт да бэйэлэрин маастарыстыбаларын толору баһылаабыт дьон буолан толоруулара да үчүгэйэ киһини сөхтөрөр буолар эбит. Бу эдэр баҕайы оҕолор, оркестр солистара Владимир Боярский, Виктор Винокуров-Дабайаан байааҥҥа оонньууллара эриэккэһин! Хомусчуттар Василена Шарина уонна Георгий Слепцов-Чаҕылхан толорор маастарыстыбалара үрдүгүн, кырдьык да виртуоз-хомусчут аатын ылыахтарын ылбыттар эбит. Театр үҥкүүһүттэрэ толоруулара бу үчүгэйин!

Манна даҕатан, көннөрү көрөөччү буоларым быһыытынан,  бу оркестр солистара кэргэннии Анна уонна Афанасий Томскайдар айар үлэлэрин уруккуттан сэргиибин. Бу музыкальнай  дьиэ кэргэн театр тутаах дьоно буола үүнэн-сайдан тахсыбыттара киһини үөрдэр. Афанасий үлэтиттэн ураты нотанан оркестровка оҥорорун истэбит, билэбит. Анна саҕалааһынынан, салалтатынан «Кыл Саха» диэн оркестр иһинэн бөлөх тэринэн айымньылаахтык үлэлииллэринэн, дьоһун ситиһиилэрдээхтэринэн киэн туттабыт. Бу кэнсиэргэ «КЫЛ САХа» бөлөх дэҥҥэ көрөр төрүт инструменнарбыгар сахалыы матыыптары толорбуттара омуна суох хас биирдии көрөөччү дууһатын кылын таарыйда.

Биир үөрүүлээҕэ бу ааттаах-суоллаах оркестр доҕуһуолунан  оскуолабыт үөрэнээччилэрин «Дьэрэлий» академическай вокальнай ансамблын толоруутугар ырыаны иһиттибит. Бу ансамбль  салайааччыта  И.В. Протопопова бэйэтин идэтин толору баһылаабыт профессионал эрэ  буолбатаҕын, улахан тэрийэр, көҕүлүүр дьоҕурун көрдөрүүтэ. Оҕолорбут ырыаны толорор маастарыстыбалара үрдээн иһэриттэн үөрэбит уонна ситиһиилэрин чиҥэтэн иһиэхтэрэ диэн эрэнэбит. «Биһиги оҕолорбут «Музыка для всех» республиканскай проект чэрчитинэн бу саха оркестрын кытта кэнсиэргэ бииргэ кыттар дьоллоннулар. Оҕолор оркестр тыыннаах доҕуһуолунан композитор Кирилл Герасимов «Сахам сирин халлаана» ырыатын толордулар. Оркестр иһинэн хаһыс да сылын ыытыллар «Саха оркестрын кытта музыка кэрэ эйгэтигэр» проект баара көрөөччүнү үөрдэр. Кэнсиэри тэрийэн, иилээн-саҕалаан ыыппыт, бу проект автордарыгар оркестр музыканнарыгар Валентина Колесоваҕа уонна Анисия Габышеваҕа махталбытын тиэрдэбит», — диэн «Дьэрэлийдэр» төрөппүттэрэ бэйэлэрин ис санааларын эттилэр.

Онон бу дьоро күҥҥэ кэнсиэр хас биирдии нүөмэрэ зал иһэ толору мустубут көрөөччүлэр  махталларын туоһутунан, дохсун ытыс тыаһынан доҕуһуолланан ааста.

Тыа дьонугар маннык кэрэ түгэни бэлэхтээбит оркестр коллективыгар, салайааччы Николай Петровка, дирижер Анюта Ивановаҕа, бу улахан кэнсиэри тэрийбит Хаҥалас улууһун оҕо театральнай оскуолатын салайааччытыгар А.И. Афанасьеваҕа махтанан туран, өссө үрдүк таһымнаах үрдэллэргэ тахсар айымньылаах үлэни баҕарабыт.

Махталлаах көрөөччүлэр ааттарыттан

Екатерина Родионовна Лебедева

 

22.12.2017

 

 




Категории: Новости · Метки:

PersonalTrainerCertification.us