Таастаахха ураты, кэрэ дьоро киэһэ.

Ыраах кытыы сиргэ олорор саха дьонугар биир дьикти киэһэ буолан ааста. Ол курдук, тохсунньу ый 14 күнүгэр Нам улууһун Таастаах нэһилиэгэр С.А.Зверев – Кыыл Уола аатынан Үҥкүү театрын артыыстара Россия, Саха Республикатын үтүөлээх артыыһа Афанасий Афанасьев салайыытынан «Музыка для всех» программа чэрчитинэн тыыннаах музыка доҕуһуолунан концерт көрдөрдүлэр.


Саха музыкальнай инструменнарын толоруутугар саха, нуучча, омук композитордарын айымньылардаах, дирижер СР культуратын туйгуна Анюта Иванова бэлэмнээн аҕалбыт бырааһынньыктааҕы программаны дуоһуйа иһиттибит. «Биһиги нэһилиэккэ оркестры аан маҥнай көрдүбүт, кэнсиэртэн нэһилиэнньэ астынна, дуоһуйда. Тыыннаах музыка алыба олус күүстээх эбит. Кэнсиэргит иһин махтанабын», — диэн Таастаах нэһилиэк Главатын солбуйааччыта Валерий Владимирович Замаратский үрдүктүк сыаналаата.

Кыл-кырыымпа, хомус, таҥсыр алыптаах тыаһыгар уйдаран бэйэбит омукпут музыкальнай инструменнарын илэ харахпытынан көрөн, эт кулгаахпытынан истэн эргэ саҥа дьыл киэһэтин өр сылларга сүрэхпитигэр-быарбытыгар иҥэриннибит. «Айар Кут» театр этно-бөлөҕүн артыыстарыгар Василена Шаринаҕа, Георгий Слепцовка, кыл-кырыымпа маастарыгар уонна толорооччутугар Руслан Габышевка махталбыт улахан. Хомус кутуллар тыаһа, кыл-кырыымпа сахалыы кылыһаҕа саха буолар төрүппүтүнэн киэн туттарбытын, сахалыы куппутун бөҕөргөттө.

Ол туһунан Таастаах оскуолатын 8 кылааһын үөрэнээччитэ Винокуров Владик маннык эттэ: “Сахалыы кыл-кырыымпа тыаһын тыыннаахтыы бастакыбын истэн дуоһуйдум”. Россия, Саха Республикатын үтүөлээх артыыһа Дмитрий Артемьев «Бэрт Хара» олоҥхоттон быһа тардан толордо, башкирдыы тэтимнээх үҥкүүтэ киһи эрэ уйулҕатын хамсатан концеры киэргэтиэн киэргэттэ. Республикабыт киэн туттар виртуоз музыкана Владимир Боярскай баяҥҥа оонньуута оҕолор сүргэлэрин, көрөөччү биһирэбилин ылла. Кэргэннии артыыстар Анна, Афанасий Томскайдар румын омугун «Күөрэгэй» ырыатын таҥсырга уонна баяҥҥа композицияларын тыыммакка дуоһуйа истэ олорон, тымныы кыһыҥҥа күөх сайын итии салгына илгийэн ааһарга дылы гынна.

Сахалыы ырыа, хомус, кыл-кырыымпалар уонна оркестр доҕуһуолунан дьикти бэйэлээх, сахалыы тыыннаах ураты, кэрэ «Дэйбиирдээх үҥкүүнү» Валентина Аммосова көрдөрдө. Оскуола оҕолоро кэнсиэр кэннэ кэлэн бэйэлэрин санааларын үөрэ үллэһиннилэр, кэнсиэри сөбүлээбиттэрин эттилэр. Ол курдук, Кокоров Женя (8 кылаас) үҥкүүлэри сөбүлээбитин, инструменнары интэриэһиргээбитин эттэ.


«Сардаҥа» оҕо түмсүүтүн лидера, 9 кылаас үөрэнээччитэ Аммосов Саша: «Бу концерт миэхэ олус үчүгэйдик ааста, саҥаны элбэҕи иһиттим, оркестр кэрэ, баай тыаһыттан кыратык соһуйдум. Оркестры бастакыбын тыыннаахтыы иһиттим, саҥа көрдүм, бэйэм музыканан интэриэһиргиир, барабааҥҥа оонньуохпун баҕарар буоламмын олус диэн сэргээтим».


Таастаах нэһилиэк аатыттан Сергей Зверев – Кыыл Уола аатынан Үҥкүү театрын артыыстара дьоро киэһэни бэлэхтээбиттэригэр ис сүрэхтэн махтанабыт. Айар үлэлэрэ ситиһиилээх буоларын, үрдүктэн үрдүк кирбиилэри баҕара хаалабыт.

Оскуола директора,
Саха Республикатын үөрэҕэриитин туйгуна
Туйаара Марковна Аргунова




Категории: Новости · Метки:

PersonalTrainerCertification.us