Чурапчылар ыллыыллар

Чурапчылар ыллыыллар

Сэтинньи 18 кунугэр Сергей Зверев-Кыыл Уола аатынан  Үнкүү театрын оркестрын артыыһа, СӨ култууратын туйгуна Василий Дмитриевич Эверстов «Дойдубутун Чурапчыбытын туойабыт, ыллыыбыт!» диэн  авторскай бырайыага 24 төгүлүн үрдүк таһымҥа ыытылынна. Концеры Василий улэлиир тэрилтэтэ Сергей Зверев – Кыыл Уола аатынан  Үнкүү театрын кэлэктиибэ тэрийэн ыытта. Театр уус-уран салайааччыта СӨ култууратын үтүөлээх улэһитэ Светлана Бессонова.

Василий Дмитриевич 1993 сыллаахха Илин Сибиирдээҕи култуура институтун саха оркестрын студиятын састаабыгар ситиһиилээхтик үөрэнэн  бүтэрэн, Үнкүү театрын  иһинэн тэриллибит бастакы саха норуотун инструменнарын идэтийбит оркестрыгар айымньылаах  улэтин саҕалаабыта.   Кини талааннаах музыкант буоларын тэҥэ, дьон-норуот сөбүлээн истэр ылбаҕай ырыалардаах биллэр мелодист. Василий Эверстов саамай сүрүн авторскай бырайыагынан Саха национальнай оркестрын доҕуһуолунан уонна баян, гитара доҕуьуолунан «Чурапчылар ыллыыллар» буолаллар. Манна ырыаларын барытын нотаҕа таһааттаран, оркестрга онотторон үгүс үлэни көрсүбүтэ. 2005 сыллаахха, «Кэрэ саас» диэн ырыаларын хомуурунньугун таһаарбыта, бу манна Баһылай сүүрбэ биэс ырыата түмүллэн киирбиттэрэ. Онтон 2007 сыллаахха,  «Дойдум дьонугар –Чурапчыларга» диэн ырыаларын диискэтэ күн сирин көрбүтэ.

Василий ону таһынан талааннаах тэрийээччи, музыкальнай продюсер быһыытынан биллэр. 2002 сылтан саҕалаан, сүүрбэттэн тахса концертнай программаны бэлэмнээн таһаарда.  Ол курдук, кини «Чурапчылар ыллыыллар» диэн авторскай бырайыага, Өксөкүлээх Өлөксөй аатынан култуура дьиэтин киинигэр, Улуу Туймаада ыһыах хочотун концертнай площадкаларыгар, Олонхо театрын концертнай залыгар, Чурапчы култууратын дьиэтин киинигэр дьон-норуот сөбүлээн, көрөөччү биһирэбилин ылан, күн бүгүнүгэр диэри, ситимин быспакка ситиһиилээхтик улэлии-хамныы, айа-тута сылдьар.

Концерга Чурапчыларын аатын киэн эйгэҕэ таһаарбыт талаанннаах ырыаһыттарбыт Анастасия Готовцева, Геннадий Семенов – Урааҥхай, Лена Керемясова, Виктор Габышев, Михаил Пестряков, Клара Ксенофонтова, Татьяна Андросова – Андреяна, Константин Мохначевскай, Александра Алексеева – Кулуһун, Марианна Федотова – Намыына, Иван Тарасов, Маргарита Кириллина, үҥкүүһүттэр Дмитрий Артемьев, Валентина Аммосова, Семен Кузьмин кыттыыны ыллылар. Концеры салайан ыыттылар Саха Республикатын култууратын туйгуннара Валентина Колесова, Николай Терютин.

Концерт Дьуон Дьаҥылы тылларыгар, Федор Гоголев матыыбыгар «Ол мин дойдум Чурапчы» диэн Чурапчы Гимнин кыттааччылар, көрөөччүлэр күргүөмнээхтик толорууларынан  түмүктэннэ.

 

Пресс-Центр

Источник Николай Терютин