Күн Куо – кэрэни кэрэхсиир аат

“Өрүү аттыгар баар буолуом.

Өйүөм, көмүскүөм, хаххалыам,

Өйдүөм, таптыам, көҥүл ыытыам,

Талбыт суолгун ылыныам,

Эйигин кытта тэҥҥэ тыллыам”.

Арай биир үтүө күн оҕом, Күн Куо-Юлия, кырыымпаны көрөн, эмискэ, сахалыы кута аһыллан, кырыымпаҕа оонньуурга үөрэниэн баҕарарын эттэ. Ол киэһэни быһа “YouTube”-ка баар кырыымпаҕа сыһыаннаах матырыйаалы, кэнсиэри барытын көрдө, иһиттэ. Мин, “Чэ, умнар ини,” – диэн саныы сырыттым, онтум кыыһым өссө эбии баҕата күүһүрэн, нэдиэлэни быһа хаайда. Мин Кулаковскай аатынан кииҥҥэ үлэлиир үөлээннээхпэр, кырыымпаҕа оонньуурга ханна үөрэтэллэрин, баҕар, кини билэрэ буолаарай диэн, ыйытан суруйдум. Арай, киһи сөҕүөх, “Кылы саҕар төрүт дорҕоон кистэлэҥэ” диэн маастар кылаас буоларын биллэрдэ. Этэргэ дылы, киһи наһаа баҕардаҕына, туох баар барыта көмөлөһөр.

Күүтүүлээх маастар кылааспыт С. Зверев аатынан Үҥкүү тыйаатырын аркыастырын артыыстара «Кыл Саха» бөлөх кыттааччылардаах ааста. Аркыастыр салайааччыта Анна Томская тус бэйэтин кылыһахха үөрэтэр ньыматын кэпсээн, көрдөрөн, быһаарда. Кыыһым баҕа санаата өссө күүһүрдэ. Кырыымпабыт суох да буоллар, куолас таһааран, маастар кылааска үөрэппит норуот ырыаларын ыллаан көрө-көрө, тарбахтарын хамсатан, кырыымпаны өйүгэр тыаһатан, дьиҥнээхтии оонньообут курдук сананна уонна үөрэнэргэ чэпчэки эбит диэн толкуйга кэллэ. Маастар кылаас кэнниттэн Анна Ивановна бэйэтэ сибээскэ тахсан, элбэх сөптөөх, туһалаах сүбэлэри, хайдах кырыымпаны оҥорторорбутун, хайдах хайысхалаах үлэлэһэрбитин ыйан-кэрдэн биэрдэ.

Маастар кылааска үөрэниэн баҕалаах киһи элбэҕэ сөхтөрдө. Ол аата сахабыт дьоно өбүгэттэн кэлбит дорҕоону дууһатынан ылынарга бэлэм эбит дии санаатым. Бу маастар кылааһы тэрийбит Үҥкүү тыйаатырын үлэһиттэригэр уһуйааччы Анна Ивановна Томскаяҕа уонна кини салайар “Кыл Саха” бөлөҕөр, администратор Уйдара Афанасьевна Яковлеваҕа кэрэҕэ угуйар үлэҕит иһин махталбытын тиэрдэбит. Өссө да үрдүк ситиһиилэри, элбэх уһуйааччылары баҕарабыт. Сыралаах үлэҕит сыанабыллаах буолуо диэн эрэнэ хаалабыт.

Кыыһым төлөпүөнүн өстүөкүлэтэ алдьанан, бу күннэргэ саҥа төлөпүөн ылар былааннаах сылдьыбыппыт. Ону Күн Куо ол харчытынан кырыымпа ылынарга быһаарынна. Баҕа санаата кырдьык күүстээҕин онно өйдөөтүбүт.

Мария ЭВЕРСТОВА, Күн Куо-Юлия ийэтэ,

Дьокуускай