«Кыл Саха» төрүт дорҕоон «Сахам сирин сарсыардата» биэриигэ кытынна.

 

 

Бу дьыл ахсынньы 10 күнүгэр С.А.Зверев-Кыыл Уола аатынан Саха Өрөспүүбүлүкэтин Үҥкүүтүн тыйаатырын аркыастыр артыыстара, «Кыл Саха» төрүт дорҕоон бөлөх кыттыылаахтара – Саха Өрөспүүбүлүкэтин үтүөлээх артыыһа Афанасий Томскай, бөлөх салайааччыта, Саха Өрөспүүбүлүкэтин култууратын туйгуна Анна Томская, Олоҥхо тыйаатыр артыыһа, Саха Өрөспүүбүлүкэтин култууратын туйгуна Вероника Лыткина «Сахам сирин сарсыардата» Россия 1 ханаалга ыалдьыттаатылар. М.Н.Жирков аатынан Муусука кэллиэһин уһуйааччыта Варвара Степанова – Арчыына бу бөлөҕү кытары ситимнээхтик үлэлэспитэ номнуо 6 сыл буолла. Кини тыыннаах муусука доҕуһуолунан сахалыы ырыаны иэйэн-туойан толордо. Анна Томская, Вероника Лыткина кыл (кылыһах) үнүстүрүмүөн туһунан сиһилии билиһиннэрдилэр уонна «Кыл Саха» төрүт дорҕоон бөлөх айар үлэтин сырдаттылар. Билигин төрүт дорҕоон үнүстүрүмүөнүгэр оонньуон баҕалаахтар элбии тураллар, онон «Кыл Саха» кыттыылаахтара айар үлэ үөһүгэр сылдьаллар. Бүтэһигэр Христофор Максимов «Кырдал кыыһа» ырыа айымньытын кыл (кылыһахха) оонньоон көрөөччүлэргэ бэлэх ууннулар.